Главная » 2014 » Февраль » 25 » Өбүгэбит ыллыгынан алгыстаах айан...
01:05
Өбүгэбит ыллыгынан алгыстаах айан...

Ийэ тылбытыгар сүгүрүйэ кэлбит үөрэнээччилэр, учууталлар, төрөппүттэр үөрүүлээх түһүлгэ5э түмсэр үгэспитинэн, Төрөөбүт тыл күнүн бэлиэтээтибит. Сарсыардаттан оскуола иһинэн үлэлиир радио нөңүө хомус дьүрүскэнэ, алыптаах дорyооно дуораһыйда, сахалыы саңа чугдаарда. Саха норуотун сырдатааччыта, лингвист С.А.Новгородов уонна кини аатынан кинигэ кыһатын быыстапката тэрилиннэ (библиотекарь Жиркова С.А.).

 Алгыс тылы киһи сэргиир-тардыһар гына СР культуратын туйгуна, норуот маастара, норуот тылынан уус-уран айымньытын тар5атааччы, Саха сирин VI сайыңңы оонньууларыгар аһыллыахтаах "Маастардар дэриэбинэлэрэ” – Уус кыһатын директора Я.П.Ядреева түһэрдэ, сахалыы сиэри-туому оңордо. Күммүт «Ийэ тыл күнүнэн истиң-иһирэх э5эрдэ» диэн тыл этии күрэ5инэн са5аланна.

Ол кэнниттэн "Өбүгэм ыллыгынан...” сэттэ түһүмэхтээх оонньуу күрэххэ-айаңңа туруннулар. Сахабыт тылын ойуута-бичигэ, оһуора-симэ5э, керө-нара, күүһэ-уо5а – барыта бу оонньууга көһүннэ. Норуот тылынан уус-уран айымньытыттан өбүгэбит оонньууларыгар тиийэ уһун, илистиилээх күөн көрсүү түмүгүнэн, бука бары сомо5олоһуу күүһүн, кыайыыга дьулуурдарын көрдөрдүлэр. Ол эрээри оонньуу аата оонньуу. Кыайыы үөрүүтүн, кыайтарыы хомолтотун билбит эмиэ баар. Көмө, өйөбүл буола кэлэн олорор истээччилэргэ, ыһыылаах-хаһыылаах ыалдьааччыларга саамай долгутуулаах түгэн – түмүк тахсыыта. Дьүүллүүр сүбэ (директоры үөрэх, иитии өттүгэр солбуйааччы Стручкова Т.П., Федорова А.К.) кыайыылаахтары бэлиэтээтэ: I миэстэни - 5, 6 кылаас үөрэнээччилэрэ (кылаас салайааччылара Захарова В.Л., Соловьева А.Т.), II миэстэни - 7 кылаас (кылаас салайааччыта Васильева Н.А.), III миэстэни - 11 кылаас (кылаас салайааччыта Солдатова Л.И.) ылан үөрүү өрөгөйүн биллилэр.

Бастыңтан бастың үөрэнээччилэргэ: саха тылын уонна литературатын олимпиадатын кыайыылаахтарыгар Терентьева Намыына5а (10 кылаас), Румянцев Костя5а (9 кылаас) "Өркөн өйгө дьулуһуу” ветеран учуутал , РФ уопсай үөрэхтээһин бочуоттаах үлэһитэ Степанова М.Г. бирииһэ  уонна саха тылыгар ситиһиилэрин иһин стипендия туттардылар, манна да5атан эттэххэ, Костя республика5а ыытыллыбыт П.А.Ойуунускай 120 сылыгар аналлаах "Көтүөххэ үрдүккэ, хотойдуу!” уоланнар аа5ыыларын кыттыылаа5а, Саха сирин суруйааччыларын анал бирииһин хаһаайына.

Саха киһитэ өл хабан, өһөх уобан, аһаан-сынньанан баран, кура сөллөн, тимэ5э төлөрүйэн, нэлэйэн-хотойон, ирэ-хоро кэпсээн-ипсээн барар үгэстээх. Ол сиэринэн, сынньалаңңа сахалыы баай-талым сандалы тула олорон, үүттээх чэй иһэ-иһэ төрөөбүт тылбыт туһунан эрэ буолбакка, ийэ тылбытынан бэйэтинэн астына, дуоһуйа кэпсэттибит. Оһуокайы оройуттан тутан оһуокайдаан ойдубут, эһиэкэйдээн тэйдибит.

Сахалыы удьуор тыыннаах о5олортон кэнэ5эскитин, ба5ар, олимпиада муңутуур үрдэлин иһин күрэс былдьаһар кыахтаах чулуу спортсменнар, искусство эйгэтигэр биллэр-көстөр дьон үүнэн тахсыахтара диэн саха киһитин сиэринэн улаханнык саңарбакка сэмээр эрэнэбит, кэтэһэбит.

 

 

Томская А.А., саха тылын уонна литературатын учуутала, 1 Хомустаах орто оскуолата

 

Просмотров: 31850 | Добавил: homus | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]